ԼՈՒՅՍ ՍՓՌԵԼ ՄԹՈՒԹՅԱՆ ՄԵՋ....

<Լրագրողի աշխատանքի նպատակը լույս սփռելն է մթության մեջ. Երբ լույս է բացվում ծաղիկներ են բուսնում, բայց շատերը չեն ցանկանում այդ լույսը, ուզում են, որ միշտ խավար մնա>

Ջոն Ալպերտ

Այսօր` հոկտեմբերի 16-ին Վանաձոր Ինֆոտան հյուրն էր ամերիկացի հայտնի լրագրող և կինոռեժիսոր Ջոն Ալպերտը, ով ողջ աշխարհում հայտնի է իր ֆիլմերով, տեսահոլովակներով, իր աշխատանքային գործունեության ընթացքում 15 անգամ արժանացել է Էմմի և երեք անգամ՝ ԴյուՊոն Քոլումբիա մրցանակներին:
 Նա հեղինակել է հարյուրավոր վավերագրական աշխատաքներ, որոնք պատմում են պատմական նշանակության իրադարձությունների մասին աշխարհի տագնապալի անկյուններում՝ Վիետնամ, Կուբա, նախկին ԽՍՀՄ, Չինաստան, Նիկարգուա, Ֆիլիպիններ, Կորեա, Աֆղանստան, Իրաք, նկարահանել է վերջին երեսուն տարիների ընթացքում աշխարհում տեղի ունեցած գրեթե բոլոր պատերազմական գործողությունները:

1972 թվականին Ալպերտը, իր տիկնոջ` Կեյկո Ցունոյի հետ միասին, հիմնադրել են «DCTV»-ն` Կենտրոնական համայնքային հեռուստատեսությունը` Ամերիկայի ամենամեծ և ճանաչված հասարակական լրատվակենտրոնը, որն այդ տարիներին առաջինն էր օգտագործում նոր տեխնոլոգիա համարվող շարժական տեսախցիկը` ծառայացնելով այն համայնքի և փոքրամասնությունների կարիքներին:

Ջոն Ալպերտը դասախոսություն կարդաց <Մեդիան որպես հասարակությունը փոխելու միջոց> թեմայով, որը պարբերաբար ընդմիջվում էր հատվածներով նրա նկարահանած ֆիլմերից: Հանդիպմանը ներկա էին լրագրողներ, հասարակական կազմակերպությունների ներկայացուցիչներ, ուսանողներ:

Ներկաների հետ հայտնի լրագողը կիսվեց իր կյանքի դրավագներով, պատմեց թե ինչ փորձությունների միջով է ստիպված եղել անցնել, ինչ ձախողումներ է ունեցել սկզբնական շրջանում, իր չգրաքննված կադրերի հաճախ է հեռացվել աշխատանքից և հայտնվել <սև ցուցակում>, սակայն չի հանձնվել, շարունակել է նկարահանել հասարակությունում եղած արատավոր երևույթները` փորձելով դրականորեն փոխել իր շրջապատը, հայրենիքը, քանզի ըստ նրա` իսկական հայրենասերը պետք է քննադատաբար մոտենա իր երկրի բացասական երևույթներին` նպատակ ունենալով այն դարձնել ավելի լավը:

Աշխարհահռչակ լրագրողի փորձն ու վարպետության դասը օգտակար և ուսանելի էին ոչ միայն լրատվության բնագավառի ներկայացուցիչների, այլև մյուս հյուրերի համար: