Ամեն ինչ սկսվում է ցանկությունից../Ես ուզում եմ որակյալ կրթություն/

Արգիշտի Զուրաբյանը Վանաձորի Պետական Մանկավարժական Ինստիտուտի հենակետային վարժարանի աշակերտ է: Իրականացնում է «Ես ուզում եմ որակյալ կրթություն» ծրագիրը, որն հնարավոր է դարձել Վանաձոր Երիտասարդական Բանկի աջակցությամբ: Ընկերների հետ նախաձեռնած իր ծրագիրը կրթության բովանդակության և կրթական որոշ գործընթացների կազմակերպման արդյունավետության մասին հարցումներից կազմված սոցիալական հետազոտություն էր, որի նպատակն էր աշակերտների արձագանքի միջոցով վերհանել դպրոցում առկա հիմնախնդիրները և արդյունքները տրամադրելով ԿԳն-ին` աջակցել նախարարությանը` որոշ գործընթացներ ավելի լավ կազմակերպելու համար: 

Նրան աջակցում է նաև «Փրոջեքթ Հարմոնի» կազմակերպությունը, քանի որ Արգիշտին  նաև վերջինիս կողմից իրականացված «Երիտասարդ առաջնորդներ առանց սահմանների» ծրագրի մասնակից է: Կազմակերպության միջոցով Կրթության նախարարությանը գրավոր տեղեկացվել է ծրագրի մասին, և ավագ դպրոցների աշակերտների համար նախատեսված հարցաթերթի նախնական նմուշն ուղարկվել է ԿԳ նախարարություն:

Փետրվարի 3-ին Վանաձորի ՀԿ Կենտրոնի ՔՀԶ հկ-ի դահլիճում տեղի  ունենացավ հարցաթերթիկների արդյունքների ներկայացումը և բանավեճ-քննարկում: 
Հրավիրված էին ուսուցիչներ, աշակերտներ, ծնողներ և վերոնշյալ կազմակերպությունների ներկայացուցիչներ:
Այդ հարցաթերթիկների մեջ աշակերտները գնահատել են դպրոցում ստացած իրենց գիտելիքները, ինչն է նպաստում և խանգարում դրանց ձեռք բերմանը, դասագրքերի մատչելիությունը, ուսուցիչների իմացական կարողությունները, կրթական ոլորտում գործող առավելությունները և թերությունները, աշակերտների կարդալու ձգտումները և այլն:

Բուռն քննարկում ծավալվեց, որի ընթացքում թե աշակերտները և թե ուսուցիչներն իրենց մտահոգությունը հայտնեցին կրթական համակարգում առկա բացերի վերաբերյալ:
Ծրագրի արդյունքում ստեղծվել են նաև տարաբնույթ պաստառներ, ինչպես նաև  կոչեր   ուսուցիչներին. դրանք կփակցվեն Վանաձորի և այլ համայնքների դպրոցներում: