Մինչև վերջ գնալու պատրաստակամությամբ սպասում ենք արձագանքի..

Երբ ամռանը վեցամսյա բացակայությունից հետո Վանաձոր վերադարձա ԱՄՆ-ից և իմ սովորության համաձայն քայլում էի քաղաքի կենտրոնով, միանգամից աչքի էր ընկնում մի քանի հանրային նշանակության տարածքների անխնամ ու բարձիթողի վիճակը: Որոշեցի քաղաքապետարանից հարցում անել, թե որ կազմակերպություններն ու անհատներն են պատասխանատու տվյալ տարածքների բարեկարգման համար: Հարցմանս պատասխանն ստացա մոտ մեկ ամսում, մինչդեռ պարտավոր էին այն տրամադրել հինգ աշխատանքային օրերի ընթացքում: Պարզվեց, որ դրանք սեփականության կամ վարձակալության իրավունքով պատկանում են թե’ մասնավոր, թե’ պետական կազմակերպությունների:

Այս ընթացքում առիթ ունեցա խնդիրը ներկայացնել նաև անձամբ ՀՀ վարչապետին: Նա իր օգնականներից մեկին հանձնարարեց ինձ հետ կապ պաշտպանել և պարբերաբար իրեն տեղյակ պահել խնդրի լուծման ընթացքի մասին: Ես զրուցեցի նաև Վանաձորի քաղաքապետի հետ և պայմանավորվեցինք միասին լուծումներ փնտրել: Ես առաջարկեցի կամ տվյալ սեփականատերերին ու վարձակալներին պարտադրել կաճ ժամանակահատվածում փոխել իրավիճակը նշված տարածքներում, կամ դատական կարգով խզել նրանց հետ վարձակալության կամ սեփականության պայմանագրերը:

Որպեսզի մեր համատեղ ջանքերը իրավական հիմքերի վրա դրվեն, ես նախաձեռնեցի ստորև ներկայացված պահանջ-նամակը Վանաձորի քաղաքապետին, որի տակ ստորագրեցին Վանաձորում գործող վեց ՀԿ-ներ, և սեպտեմբերի 14-ին այն ներկայացրի Վանաձորի քաղաքապետարան:

Հույս ունեմ, որ մեզ այս հարցում կաջակցեն նաև քաղաքացիական հասարակության ավելի մեծ թվով ներկայացուցիչներ: Մենք մեր աջակիցների թիմն ընդլայնելու նպատակով նաև պարբերաբար տեղեկություններ կհրապարակենք խնդրի զարգացման մասին:

ՎԱՆԱՁՈՐԻ ՔԱՂԱՔԱՊԵՏ

ՊԱՐՈՆ ՍԱՄՎԵԼ ԴԱՐԲԻՆՅԱՆԻՆ

Պահանջ

Հարգելի պարոն Դարբինյան,

Վանաձորի մի շարք հանրային նշանակության տարածքներ`

• «Արցախ» պուրակը,
• 4-րդ դպրոցի դիմացի պուրակը,
• Քիմիագործների մշակույթի պալատին կից այգին,
• «Ազատամարտիկների պուրակը»,
• Վանաձորի քաղաքային այգին,
• 11-րդ դպրոցին հարող երկու ստորգետնյա անցումները,

իրենց ներկայիս բարձիթողի վիճակով տագնապալի իրավիճակ են ստեղծել քաղաքում:

Դրանք ոչ միայն չեն ծառայում իրենց հանրային նշանակությանը և սպասարկում հանրության կարիքները, այլև, գտնվելով քաղաքի կենտրոնում, բացասականորեն են ազդում Վանաձորի ընդհանուր մթնոլորտի ու վարկանիշի վրա: Քաղաքի հենց կենտրոնում նման իրողությունների առկայությունը լիովին հակասում է զբոսաշրջությունը որպես առաջնահերթություն սահմանած իշխանությունների նպատակներին և քաղաքականությանը: Սա նպաստում է նաև քաղաքի բնակիչների շրջանում անկումային տրամադրությունների խորացմանը և երկրի ապագայի նկատմամբ հավատքի կորստին: Հայաստանի Հանրապետության երրորդ քաղաքի նման վիճակը չի կարող լավ ապագայի հույս ներշնչել ո’չ քաղաքի բնակիչներին, ո’չ էլ նրա հյուրերին:

Ցանկանում ենք նշել, որ խնդիրը ներկայացվել է անձամբ ՀՀ վարչապետ պարոն Տիգրան Սարգսյանին և գտնվում է նրա ուշադրության կենտրոնում:

Որպես քաղաքացիական հասարակության ներկայացուցիչներ` մի շարք հասարակական կազմակերպությունների և մտավորականների անունից պահանջում ենք Վանաձորի քաղաքային իշխանությունների գործուն միջամտությունը նշված տարածքներում իրավիճակը փոխելու նպատակով: Միաժամանակ, հայտնում ենք խնդրի լուծմանն օժանդակելու մեր պատրաստակամությունը:

Նախաձեռնությունը`

«Երիտասարդական ակումբների դաշնություն» ՀԿ-ի,

Ներկայացուցիչ` Տիգրան Գրիգորյան / /

Հեռ: (091) 30 89 37 begin_of_the_skype_highlighting            (091) 30 89 37      end_of_the_skype_highlighting, E-mail: tigran_lori@yahoo.com