ՄԱՐԴԱՄԵՋ

Մարդամեջ և Սոցիալական նորարարությունների ճամբար.

 Կարելի է մտածել` ինչ կապ կարող է գոյություն ունենալ այս երկու հասկացությունների միջև: Եթե մեկ ամիս առաջ լսողները կասեին, որ ոչ մի կապ գոյություն չունի, ապա այսօր, Հայաստանի /և ոչ միայն/ ակտիվ, ինֆորմաված և սոցիալական ցանցերում <բնակվող> հասարակությունը ժպիտով կպատասխանի, որ ՄԱՐԴԱՄԵՋ ասվածը հենց սոցիալական նորարարությունների ճամբարն է:

Մարդամեջը մեկնարկեց նոյեմբերի 18-ին Ծաղկաձորում: Այն  իր բնույթով Հայաստանում նախադեպը չուներ: Ճամբարին մասնակցում էին տարբեր ոլորտներ ներկայացնող 60  երիտասարդներ, գաղափարների հեղինակները, հրավիրված փորձագետներ: Նախապես ներկայացված վաթսունինը գաղափարներից հանձնաժողովը ճամբարի համար ընտրել էր վեցը. 

1. Սոցիալական ցանց <<Հազար ու մի մանրուք>>- Սամվել Մարտիրոսյան
2. Նախընտրական խոստումների մոնիթորինգի հարթակ- Արամ Թովմասյան
3. Wish2Real- Ստեփան Սմբատյան
4. Հասարակական տրանսպորտի չվացուցակ- Լիլիթ Մանուկյան
5. Պետական պոլիկլինիկաներում սպասարկման և հիվանդների շահերի պաշտպանության մոնիթորինգ և հանրայնացում- Անի Դավթյան
6. Հիպերտեղայնացված նորությունների հարթակ- Գայանե Միրզոյան

Հնեց այս գաղափարների շուրջ Մարդամեջի մասնակիցները բաժանվելով խմբերի աշխատեցին երկու օր: Խմբերում ներգրավված էին տարբեր մասնագիտության տեր մարդիկ, ովքեր աշխատանքի հստակ բաժանման շնորհիվ տարբեր դերակատարում ունեին: Բոլոր խմբերի առջև դրված էին հստակ առաջադրանքներ.  հստակեցնել գաղափարը, գտնել այն սոցիալական խումբը, որին ուղղված էր ծրագիրը, ընտրել և մշակել կայքում տեղադրվելիք նյութը, ստեղծել կայք էջը, ձևավորել այն, գտնել online և offline տարածման եղանակներ:

Աշխատանքը բավականին բարդ էր, բայց ընթանում էր մեծ ոգևորվածությամբ, հետաքրքիր ու դինամիկ, առողջ մրցակցային մթնոլորտում: Այս ամենը նպաստեց այն բանին, որ այդքան կարճ ժամանակում գաղափարները վերաձևավորվելով դարձան պատրաստի արտադրանքներ` կայքերի, ֆեյսբուքյան խմբերի և այլնի տեսքով:

Սոցիալական նորարարության ճամբարն ամփոփվեց պրոֆեսիոնալ ժյուրիի կողմից: Չնայած բոլոր ծրագրերի օրիգինալությանը` գլխավոր մրցանակը ստացավ <<Հասարակական տրանսպորտի չվացուցակ>> գաղափարը: Խմբի անդամները ստացան հավաստագրեր, ինչպես նաև 4000 ԱՄՆ դոլար, 2 տարի ժամկետով ինտերնետի անվճար բաժանորդագրություն և անվճար հոսթինգի իրավունք:

Հատուկ քվեարկության միջոցով որոշվեց նաև  <<Հանդիսատեսի համակրանք>> նոմինացիան, որի հաղթող ճանաչվեց ամենալավ ներկայուցումը պատրաստած <<Հազար ու մի մանրուք>> գաղափարը ներկայացնող ILIKE թիմը, որի անդամներն արժանացան մրցանակների:

Կազմակերպիչները խոստացան կրկին քննարկել ծրագրերը և ֆինանսավորել ևս երկու գաղափար:

 Մարդամեջն ավարտվեց` մասնակիցներին պարգևելով բավարարվածության մեծ զգացողություն, գիտելիքների ու փորձի համալրում, նոր ընկերներ ու հետագա համագործակցության հեռանկարներ, և ի վերջո յուրօրինակ ու տարբերվող հանգստյան օրեր:

Վանաձորը Մարդամեջում ուներ վեց ներկայացուցիչ: