Վանաձորում ճանապարհաշինական աշխատանքներն ավարտվեցին

Ի՞նչ կարծիք ունեն վանաձորցիները կատարված աշխատանքների մասին

Մի քանի օր է, Վանաձորում ավարտվել են հիմնական ճանապարհաշինական աշխատանքները: Ներկայումս ընթացքի մեջ են միայն  Հալաբյան կամրջի վերակառուցման աշխատանքները, որն իրականացվում է ՀՀ տրանսպորտի ու կապի նախարարության պատվերով: Կամրջի հիմնանորոգման համար կծախսվի մոտ 72 մլն դրամ:

Լոռու մարզպետարանի աշխատակազմի քաղաքաշինության վարչության պետ Արմեն Ջանազյանի խոսքով՝  2017 թ.-ի ընթացքում  Վանաձորի փողոցների ասֆալտապատման ու փոսային նորոգումների համար տարբեր աղբյուրներից կատարված ֆինանսավորման արդյունքում ծախսվել  է շուրջ 461 մլն դրամ:

Համայնքային բյուջեից քաղաքի փողոցների փոսային նորոգման համար հատկացումը կազմում է 93.5 մլն դրամ:  

Կառավարության կողմից Լոռու մարզպետարանին հրատապ ծրագրերի իրականացման համար հատկացվող գումարից այս տարի Վանաձորի փողոցների համար տրամադրվել է 100 մլն դրամ:

Մյասնիկյան փողոց

 Եվս 195 մլն դրամի չափով ծախսվեց կառավարության կողմից հատկացված միջոցներից՝ սեպտեմբերից մեկնարկած լայնածավալ ճանապարհաշինական աշխատանքների համար: Այն իրականացրեցին «Ճանապարհ» ՓԲԸ-ն, «Շինպլյուս», «Վառմաշ»  և «Հիդրո» սահմանափակ պատասխանատվությամբ ընկերությունները:

Մասնակի կամ կապիտալ ասֆալտապատման աշխատանքներ իրականացվեցին քաղաքի մի շուրջ 2 տասնյակ փողոցներում:

Տիգրան Մեծ փողոց

Ա. Ջանազյանի խոսքով՝ ընդհանուր առմամբ կատարվել է 32.500մ² տարածքաչափով ասֆալտապատման և 10.000 մ² փոսային նորոգման աշխատանքներ:

«Բարեկարգված ճանապարհների ցանկում են դեպի ինֆեկցիոն հիվանդանոց տանող, թիվ 10 դպրոցիհարակից ճանապարհները, Տպագրիչների փողոցը, Դիմաց թաղամասի մի շարք փողոցներ...Հիմնական շեշտը դրվել է առավել բանուկ փողոցների բարեկարգման վրա»,- նշեց Ա. Ջանազյանը:

Ճանապարհաշինական աշխատանքների ավարտից հետո  ոլորտը ներկայացնող մասնագետներից կազմված աշխատանքային խումբը շրջել է քաղաքում, ուսումնասիրել կատարված աշխատանքները:

Ա. Ջանազյանի խոսքով՝ արձանագրել են որոշակի թերութւններ, ճանապարհաշինական ընկերություններին տրվել են այդ թերությունները վերացնելու հանձնարարականներ:

Ինֆոգրաֆիկա

Մինչ այժմ ճանապարհաշինական աշխատանքների համար երաշխիքային ժամկետ էր սահմանված մեկ տարին: Այս տարի առաջին անգամ մրցույթը շահած կազմակերպությունների հետ կնքված պամանագրերով երաշխիքային ժամկետ է սահմանվել երեք տարին: Սա նշանակում է, որ հաջոդող երեք տարիների ընթացքում  ճանապարհներին նորոգված հատվածներում խնդիրներ առաջանալու դեպքում կազմակերպությունները պարտավոր կլինեն շտկել դրանք սեփական միջոցների հաշվին:

 Նշենք, որ ՀԿ կենտրոնի կողմից իրականացվող «Վանաձոր Ինֆոտուն» ու «ՀաՄաՏեղ» ծրագերի շրջանակներում անցկացված հարցման ընթացքում Վանաձորի կարևորագույն խնդիրների թեժ տասնյակում ճանապարհների անբարեկարգ վիճակն զբաղեցնում էր առաջին հորիզոնականը: Հարցումն իրականացվել էր այս տարվա օգոստոսին, երբ լայնածավալ ճանապարհաշինական աշխատանքները Վանաձորում դեռևս չէին մեկնարկել:

Այժմ, երբ դրանք ավարտված են, փոքրիկ հարցախույզ իրականացրինք վանաձորցիների շրջանում, պարզելու համար նրանց տեսակետները կատարված աշխատանքների ու քաղաքի փողոցների ներկա վիճակի մասին: 

Թթու ջրի հարակից փողոց

Մոտ երկու տասնակ վարորդների ու հետիոտների  շրջանում իրականացված հարցման ընթացքում թեև շատերը խուսափեցին ներկայանալ, սակայն հայտնեցին իրենց տեսակետը:

Համեմատական կատարելով նախկինի հետ, վարորդները հիմնականում նշում էին, որ բավականին դրական տեղաշարժեր կան: 

Լավ կլինի, որ քաղաքապետարանն ուշադրություն դարձնի ոչ միայն կենտրոնական, այլև երկրորդական փողոցներին ու մայթերին. ասում էին անցորդները, մատնանշելով, դեռևս նորոգման ենթակա բազմաթիվ փողոցներ կան:

Ակնհայտ դրական փոփոխությունների մասին խոսելով հանդերձ վանաձորցիները ակնկալում էին, որ դրանք շարունակական կլինեն, իսկ կատարված աշխատանքների որակը թույլ կտա փոքրիշատե բարեկարգ ճանապարհներով երթևեկելու հաճույքը վայելել երկար:

Մեդիագրագիտության դասընթաց

Նյութը պատրաստվել է ՀԿ կենտրոնի  «Վանաձոր Ինֆոտուն» ծրագրի կողմից իրականացվող «Մեդիագրագիտության» դասընթացի շրջանակներում: Դասընթացի մասնակիցների աշխատանքները համակարգել է լրագրող-սեմինարավար Գայանե Սարգսյանը: